ورلڈ بینک وفد کا دورہ پاکستان: اقتصادی ترقی پر اہم مذاکرات

ورلڈ بینک کا ایک اعلیٰ سطحی وفد پاکستان پہنچ گیا ہے، جہاں وہ اہم حکومتی شخصیات سے ملاقاتیں کرے گا۔

عالمی مالیاتی ادارے کے ایگزیکٹو ڈائریکٹرز پر مشتمل یہ وفد وزیراعظم، وزیر خزانہ اور وزیر اقتصادی امور سے تبادلہ خیال کرے گا۔

ورلڈ بینک کے ذرائع نے سما ٹی وی کو بتایا کہ وفد کی ملاقاتیں وفاقی وزیر برائے منصوبہ بندی اور وزیر توانائی سے بھی طے ہیں۔

ان مذاکرات کا مقصد اقتصادی ترقی کے منصوبوں اور سرمایہ کاری کے مواقع پر غور کرنا ہے۔

دورے کے دوران، کنٹری پارٹنرشپ فریم ورک پر عملدرآمد کی حکمت عملی پر بھی تبادلہ خیال کیا جائے گا۔ یہ معاہدہ ابتدائی طور پر 10 سال کے لیے 20 ارب ڈالر کی مالیت کا ہے، تاہم مستقبل میں اس فنڈنگ کو 40 ارب ڈالر تک بڑھانے کی توقع کی جا رہی ہے۔